Sanai ake, ainain Kamis di sakola kaiku SDN 12 Sarae, biasa kai na kaboro weki ta tando sakola. Kade'e nggahi kapala sakola, loa rau guru ma paja di ma cepe kapala sakola. Wentoku ringa eli be sakola. Sara'a ana sakola rai kaboro weki ta tando sakola. Kidi bari labo lenga sama kela. Ibu bapa guru ato mena barisa. 

    "Assalamu alaikum warahmatullahi wabarakatuh, " eli kapala sakola ku ma tampu' u ngoa ra tei. " Sanai ake ke, wara ne' e ngoa ba ibu. Sakola ndai ke ne'e lampa pawai kalili kampo kompe sakola ndai. Ake ke loa ku ra bade ba dou, sakola ndai rau ke bune sakola ma kalai. Pala ade lampa kai re, ndai kani mena rimpu tembe nggoli ma siwe na, taho ana mori taho ibu guru na. Ma mone labo guru mone kani mena katente tembe nggoli kani sambolo. Pawai ndai ke takarawi ku ainain Sabtu. Ngoa mena dou ma tua mu kau ka kani kai rimpu".

" Bune, loa mena mai kani sarimpu ro katente hari Sabtu re? " sodi ba kapala sakola. Wara ma cambe loa, wara ma ka midi weki. Lenga ku di kompe ku la Nayla kamidi weki. 

         Wa'u nggori nuntu kapala sakola. Bune ra biasa kai sara'a ana sakola ra guru jabatanga mena angi ampo lu'u di kela. 

Edaku la Nayla mbuipu kamidi na weki na. 

"Eee Nayla ee, bau si midi kaimu weki akan wa'u na? " sodiku. 

" Nahu ke wati wara tembe nggoli ku ku nggoke, " cambe ba la Nayla. 

" Nene ku ka, wati ntau na tembe nggoli si. Kombi edera mai si sakola nahu ni ainain Sabtu re ndo, " nggahi wali la Nayla. 

" Inaee..., aina pana wa'u. Nahu ma sodi wa'u ina ku ndo, " nggahi ku di la Nayla. Rai losa lalo ku ade kela. Ngupa ku ina ku. Ina ku re na tei di sakola ake rau. 

       Lao rakaku Ina ku ma wunga tampu'u tei. 

"Assalamu alaikum. Inaa..., lenga mada la Nayla ka ne'e da mai sakola si ainain Sabtu re, " nggahiku. 

"Ba bau damai kai na anae ? " sodi ba inaku.

"Sia ka waura made ina na. Ngge' e labo nene na. Nene na ka, wati ntau na tembe nggoli di rimpu pawai kai, " caritaku di ina ku. 

" Wara tembe aka uma ka. Pala ba da bou na. Wara sampasa na. Wati bune na, kaupa kani tembe aka pede. Ngoapu la Nayla ka, " nggahi inaku. Ringaku nggahi ina ku, rai losa lalo ku. 

      Samporo ede, doho raka ku la Nayla.

 " Aina susa, mai pa sakola hari Sabtu re, wara tembe aka uma nahu ka. Kani sepe pa, nggahi ina nahu, "ngoaku la Nayla. 

" Iora lenga ee.., tarima kasi ndo, " nggahi la Nayla. Sarome ra pohu ba la Nayla. Raka kai ba ainain Sabtu sara'a guru ro ana sakola mai mena kani tembe nggoli. Konde lenga doho ku dou sumba ra ende kani mena rimpu. Gaga gaga ja. Loa mena ja kani rimpu. 

"Ee.. lenga.., be si tembe di sepe nahu re, " wentoku sodi ba la Nayla ma waura wara di kompe ku. 

"Iyo pala lenga ee. Maita lu'u dei kela. Ta kau kakani ibu guru, " receku la Nayla rabi salaho ku rimana. Nggori kani re, rai kaboro weki di tando sakola. Sara'a na waura kaboro weki. Ne'e ra tampu'u lampa. Samporo ede, kabari tolu -tolu ba ibu guru. Ede ntika ja tembe nggoli. Wara ma kala, wara ma monca, wara ma me'e. Poro na mboto poda. Ntika ja wau si mboto ma kani. Nggori ede losa di sakola lampa kalili dei rasa kompe sakola. Nggahi kapala sakola, loa ku dou kompe sakola re eda rawi ndai, loa ku sakola na ana na di SDN 12 Sarae. 

       Wau nggori lampa kalili re, lu'u mbali ra ta sakola. Doho sanawa di wombo fu'u fo'o ra fu'u sambi ngaha salaho pangaha, nono es. Mai lalo la Nayla. 

"Ake lenga e tembe mu. Tarima kasi ndo, " nggahi na. Weha aoku tembe. "Iora lengae, sama-sama, " cambe ku. Wehaku tembe di rima la Nayla. Dahu adeku sampu na, lao mbei lalo ku inaku. 

"Inaaa..., santabe ta ake tembe bali ba la Nayla, " nggahiku. Weha ao ba inaku tembe. Rai losa lalo ku. 

" Anaee.., mai wa'u! " ou mbali ba inaku. 

"Mbei karu'upa la Nayla tembe ake ni. Wau ja mpasa rau tembe ake. Pede re kapala sakola ka, sakali sawura kau mai sakola kani rimpu tembe nggoli. Tabe ku sepe kaina la Nayla, " nggahi inaku. Roci-roci wehaku tembe re, rai losa ngupa ku la Nayla. 

"Nayla..., weha ba nggomi tembe ake nggahi inaku. Sakola ndai ke, sakali sawura kani rimpu mai sakola.