La Santi

      La Santi re ngara lenga  doho laboku aka sakola. Sia ake dou ma dawara. Ina na landa oha  aka serasuba. Amana waura made. Ina na landa di kengge lapanga Serasuba. Sia ke ntuwu wi'i na sakola. Tio si kani ra lombo na re na nangi adeku. Mai na sakola re mbotopu da ngaha na. Ntuwu mbeiku piti di belanja na. 

      Ake la Santi waura saminggu damai na sakola. Sodi ba adeku, " Bau da mai kaina sakola la Santi ke? ". 

Sodi ku ibu guru, " Ibu.., bauda mai sakola kaina la Santi? ". 

" Kombi ke anae,wati wara kahaba na ta ibu, " cambe ba ibu guru. Kombi na hengge la Santi ke ni. Sampe dula sakola samada ku la Santi. Maklum wara sa ka lucu na weki rau na. 

       Raka ba amangadi lao lampa- lampa ku di Serasuba labo mama ra papa, labo ari doho rauku. Ndiha ja ra dou di Serasuba. Au ncau kombi landa dou. Wunga caru ngahaku baso, eda laloku la Santi wunga landa su'una kaca lowi. Ou laloku.." Santi.., mai wau! ". Pambari la Santi ringa na dou ma ou ngarana.

" Iyo lengae, "cambe ba la Santi rai raka na doho kaiku. 

" Bau da lao sakola kaimu, ?" sodi ku. Nenti salahoku rimana. 

" Irae.., watira wara bajuku mataho dikani lengae, waura mpoi nci'i nggke, "cambe ba la Santi. 

Kasija adeku ringa. Nuntuku labo la Santi ringa ba mamaku. Nggahi lalo mamaku, " Nais lao sakola kani baju be ma wara. Wara baju dikani mu nais re". Aina nefa ndeu sidi ana ro,! ".

" Iyota.., tarimakasi. Mada malao amba karu'u wau, " Nggahi la Santi. 

       Raka ba nais re lao sakolaku, wa'aku baju la Santi. Edaku la Santi, mai na sakola kani baju makalai. Mbei laloku sia baju ra wa'aku. 

" Mai ta lao cepe baju mu, " receku la Santi rabi salahoku rima na. Nenti angi rima labo la Santi lao cepe baju di kontu sakola wara hidi cepe kai kani. Samporo ede, eda laloku la Santi waura kani baju ra wa'aku.Sarome na. "Tarima kasi lenga ndo, "nggahi la Santi. 

" Iyora lengae, sama-sama, "cambe ku pohu salahoku sia. Sana adeku loaku ka neo diru'u lenga. Edaku sarome la Santi sana adeku eda. Ka sana ade dou ma da wara, raka kai pahala nggahi ibu guru. Wara si ntau ma ncewi cengga labo dou. Syukurku di ruma tala, waura karawi mataho, wara di poke di ai nai ma kento.